Rev 9 | KYG | STEP | Napa faefu enisole vekamo'a pikulimo hu'nige'nae'mo agovana mago kanefi'mo koku'napati'mo aino atafai lamino ma mopafi'mo asagauno ai'nige'na age'nove. Ki'mo ive keli kitale ki'mo ami'nigeno ali'niye.

Revelation of John 9

1 Napa faefu enisole vekamo'a pikulimo hu'nige'nae'mo agovana mago kanefi'mo koku'napati'mo aino atafai lamino ma mopafi'mo asagauno ai'nige'na age'nove. Ki'mo ive keli kitale ki'mo ami'nigeno ali'niye. 2 Agaemo ive kelile kitamo yaki'nigeno lusi kava huno halinamo ai'nigeno'ae'mo yegemo'e koku'na'mo'e'mo hani hu'niye. 3 Halinafati'mo mago akenu anaga'mo ma mopafi'mo haleli'a emi'e'nae. Goti'a himamu'apimo alino apami'nige'apae'mo sokopiyonigana hu'a hapae'nae. 4 Apakaefe'mo, ma mopafi kahaugi hegafatalili yanagi yosagi hutapa alita hosu hutapa o'ateyo. Goti alagena ya'amo hapanile'mo ohane'nisiya vaya'age'mo hapaeyo, huno hapa pai'niye. 5 Kamiti apamagisaya himamu'apimo alino o'apami'nifa faefu'a kaile'mo vaya'mo hapaesageno lusi kava huno apakafu kisiyafe'mo himamu'apimo alino apami'niye. 6 Ani afina'mo vaya'mogi apakai'apimo falisaya ka'mo afa'a kahauya hu'a o'agegae. Falisayafe'mo hapaugiya'monanafa afa'a ofaligae.

7 Akenu anaga'mogimo kame nehaya hosigana agufa apakufamo alite'a mai'nae. Apakenopale'mo goligana kakolitamo ae'a ne'apakasaya vaya'mogi ali'a ne'malaya agufa kakolitamo hane'niye. Apaugosa'amo ma mopafi vaya'ai apaugosagana huno hane'niye. 8 Apayoka'amo a'ne anaga'ai apayokagana huno yatala apayoka'mo hane'niye. Apave'mo laiyoni anaga'ai apavekana huno hane'niye. 9 Hapaifi'yale'mo hu'a ali'naya ya'mo ati vaya'ai kapa siotigana huno hane'niye. Hapaku agemo'mo kame hisayafe'mo asole hosimogi talalagana ya'mo ae'a vayu huli'a nagu nagu hu'a u'nageno'ae'mo age ne'aigekana huno age ai'niye. 10 Apaigo'ya'amo sokopiyonimo aigo'yagana huno hane'nigeno vaya'mo nehapaeya aigo'yagana agufa apaigo'yamo hane'niye. Apaigo'yaleti'mo hapaesageno apakafu kisiya himamu'apimo hane'niye. 11 Mago vekamo kini veka'apimo mai'neno yagaino apate'niye. Ani vekamo ayo'amo o'male'niya ive kelile'mo ne'yagaiya enisole vekamo agi'amo Himulu gefati'mo Amatoni'ae hu'a agi ae'nage'a Galiki gefati'mo Apoliyani'ae, hu'a agi ae'nae. Ani agimo aepa'amo vaya'mo nehapaeya vekae. 12 Hogote kana kava'mo ago hano hutegeno lole kana kava'mo afa'a hane'niyanageno henaga'amo afole aigiye.

13 Napa sigisi enisole vekamo'a pikulimo hu'nige'nae'mo afuvana mago vekamo Goti aulagale'mo hane'niya goli hi'yalamu'mo folagapi'mo mai'neno'ae'mo keya ae'niye. 14 Agaemo pikulimo ali'neno napa sigisi enisole vekae'mo, Lole'e lole'e enisole vaya'mo alopa ani'mo nelamiya ani'mo agi'amo Yufaletisi ani agi'nale'mo nofi ki'a apate'naya enisole vaya'mo uka alika hakalu heka apato, huno ha pai'niye. 15 Uno lole'e lole'e enisole vaya'mo hakalu heno apate'niye. Goti'a ma mopafi mai'naya vaya'mo lole'e mago'e vayapati'mo magoke vaya'mo apamagisayafe'mo ani aovamogi ani afina'mogi ani kaile'mogi ani kafugamogi ali'ya'mo aepa fai'a alisayafe'mo alo huno apate'niye. 16 Hosile'mo fai mai'naya ati vaya'mo na magi vaya'mo mai'nafi huno naha paino'ae'mo tu hataleti miliyoni'amo mai'nae, huno naha pai'niye.

17 Alagamuna agegekana hu'na apakovana hosi'e hosile'mo fai mai'naya ati vaya'e'mo mai'nageno kapa sioti'apimo'a atagana huno haesa huge oko huge sofa yafa'mo kae'nageno nekama'age hugekana agufa ya'e'mo apake'nove. Hosimogi apakenopamo laiyoni anaga'ai apakenopagana huno hane'nigeno apavayafati'mo atagi halinagi ata neleya yafa'mo agi'amo sofa yafanagi huno le'niye. 18 Ani hosimogi apavayafi'mo hane'niya kayo'mo ata kayotetinagi halina kayotetinagi ata neleya yafa kayotetinagi hu'a lole'e mago'e vayapati'mo magoke vaya'mo kamiti apamagi'nae. 19 Hosimogimo apamagisaya himamu'apimo apavayafi'mo hanege apaigo'yale'mo hanege huno hane'niye. Apaigo'yamo nagalo'yavemo aigo'yakana huno hane'nigeno apaigo'ya atupale'mo nagalo'yavemo agenopagana huno hane'nige'apae'mo vaya'mo hapae'nae. 20 Ani kayoteti'mo kamiti o'apamagi'naya vaya'mogimo hosu enisole vaya'aite'e alo hu'naya aigofe goti'apimogite'e'mo o'apatale'a mago'e hu'a mono hu'nae. Apakaemo aigofe goti'apimogi goli yafateti'mo alo huge siluva yafateti'mo alo huge haesa yafateti'mo alo huge afa yafateti'mo alo huge yosaleti'mo alo huge hu'a alo hu'naya aigofe goti'apimogimo mago ya'mo o'agege ge o'afige ka'mo umenitata osuge nehaya aigofe goti'apimogimo o'apatale'nae. 21 Ani kava hu'a vaya'mo hapaege Satani himamu'aleti'mo no'agaya aeto agufa aune kava'mo huge kumai kava'mo huge kumaya'mo alige nehaya kava'apimo atalete'a apaipamo ali'a afe ole'nae.